Mańǵystaý oblysy Qaraqııa aýdany Quryq aýylynda «saıası qýǵyn-súrgin jáne asharshylyq qurbandaryna» arnalǵan memorıaldyq keshen ashyldy. Elbasynyń «Bolashaqqa baǵdar: Rýhanı jańǵyrý» maqalasynyń «Týǵan jer» jobasy aıasynda salynǵan memorıaldyń jalpy aýdany - 882 sharshy metr.
Bul joba sheńberinde shaǵyn alleıa men arnaıy taǵzym etetin oryndar salynǵan. Eskertkish Qazaqstan halqyna orny tolmas qasiret pen qaıǵy ákelgen saıası-qýǵyn súrginniń 80 jyl tolýyna oraı zulmattyń qurbandary men zardap shekkenderdi máńgi eske alý maqsatynda turǵyzylǵan.
-О́tken ǵasyrdyń 1928-1931 jyldary Keńes ókimetiniń solaqaı saıasatynyń kesirinen qazaq halqynyń ómir – salty, dástúr – mádenı turmysy shuǵyl túrde zorlyqpen kúshtep ózgertildi. Asyra silteý belsendileriniń ozbyrlyǵynan sol náýbettiń tusynda qazaq halqynyń 2 mıllıonnan astam bozdaqtary qyrǵynǵa ushyrap, 1,5 mıllıony shet elderge bas saýǵalap ketýge májbúr boldy. Sol bir zobalań jyldary bastaryn ólimge tigip qazaqtyń qamyn oılaǵan qaıratker tulǵalaryn búgingi osy jıynda eske alyp, olardyń rýhyna taǵzym etý bizdiń azamattyq paryzymyz. Osyndaı tulǵalarymyzdyń arqasynda Qazaqstan Respýblıkasynyń Táýelsizdigine 26 jyl tolyp otyr.
Osy oraıda aýdan ortalyǵy Quryq aýylyndaǵy osy memorıaldyq keshen 1931-32 jyldardaǵy ashtyq pen 1937-38 jyldardaǵy saıası qýǵyn-súrginniń qurbany bolǵan jerlesterimizdiń rýhyna qoıylǵan máńgilik eskertkish, dedi aımaq basshysy Eraly Toǵjanov.
Sondaı-aq, Quryq aýylynda taǵy bir nysan - 500 oryndyq jataqhana el ıgiligine berildi. Aýdan tarıhyna rýhanı serpin berer jańa kezekti joba - Quryq aýylyndaǵy jumysshylarǵa arnalyp salynǵan. NKOK (Nort Kaspıan Opereıtıng Kompanı) mekemesiniń qarjylandyrýymen boı kótergen jańa jataqhana qurylysyna 1 mlrd 352 mln teńge jumsalǵan. Jataqhana ǵımaraty 10 723 sharshy metr aýmaqty alyp jatyr. 5 qabattan turatyn ǵımarat barlyq qajetti jabdyqtarmen qamtylǵan.
Ashylýda sóz alǵan aımaq basshysy aldymen óńirdiń áleýmettik-ekonomıkalyq damýyn aıtyp berdi.
Qazirgi tańda, Qaraqııa aýdanynda respýblıkalyq mańyzy bar kóptegen jobalar iske asyrylǵan. Quryq paromdyq kesheniniń ekinshi kezeńi aıaqtalyp, paıdalanýǵa berildi. Josparlanǵan kórsetkishten asyryp 1mln. 250myń tonna júk tasymaldanyp, kelesi jyly bul kórsetkish odan 2 ese ósedi dep josparlanǵan.
Prezıdenttiń «Nurly jol» baǵdarlamasy aıasynda ındýstrıalızasııa kúni Shetpe-Jetibaı-Aqtaý avtojoly paıdalanýǵa berilgen. Jalpy, osy jyly Qaraqııa aýdany Elbasynyń «Rýhanı jańǵyrý» baǵdarlamasy 2,5 mlrd. sommaǵa 23 jobany demeýshiler tarapynan iske asyrǵan.
Kelesi jyly Quryq aýylyndaǵy kúnine 50 myń tekshemetr shyǵaratyn sý zaýyty, tazartý ımaratynyń qurylystary bastalady. Áleýmettik nysandar boıynsha Jetibaı aýylyndaǵy 200 oryndyq balabaqsha, Senek aýylyndaǵy 150 oryndyq sport kesheni salynady.
Oblysta «Týǵan jer» baǵdarlamasy qarqyndy iske asyrylýda. Qazir ýaqytta kásipkerler, turǵyndar týǵan aýylyna barynsha kómektesip, kórkeıtý jumystaryna belsendi aralasýda, delingen Mańǵystaý oblysy ákimi baspasóz qyzmeti habarlamasynda.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy